完成訓練的青年人上門探訪長者
第一期的全健推動師：樂高六色積木（Six Bricks）
樂高六色積木（Six Bricks）源自於南非，強調全人發展，為安全及易於應用的工具。青少年透過實體操作得到經驗、從而學習在人際間互動及處理情緒。透過「遊戲中學習 (Learning through Play)」，有助於發展大小肌動作、認知、記憶、語言、專注力、解難、創意社交能力及數理等活動。另外，在計畫中，我們會探訪乙明邨的長者，義工可以和長者聊天，與長者一齊玩積木。在過程之中，義工不但能學以致用，同時也可以給長者帶來歡樂和溫暖。
 |
 |
義工參與工作坊中
挑戰積木塔
在第一期的全健推動師中，中心提供了培訓給青年，六色積木玩法簡單，學識完之後教會長者一齊同樂，甚至乎長者都歡迎青年人黎到屋企一齊玩～
在陸陸續續的上門探訪和在中心一齊玩的日子中，我們都蒐集到長者的一些說話：
探訪故事
申婆婆
我以前細個會玩拋石仔、天九和魚蝦蟹。而最鍾意同鄰居踢毽。雖然細個覺得可以玩嘅嘢好少，但只要可以去隔離鄰居屋企串門同玩，就已經好滿足。
而到依家同啲後生仔玩六色積木嘅感覺，就好似細細個玩嘅天九咁。因為形狀同天九牌都係長方形。但依家同以前，我都係鍾意以前玩具多啲，因為可以同其他人有多啲聯繫。
不過玩咩都唔緊要，最重要係有人認真聽下我講以前嘅經歷就心滿意足了！
P.S. 串門係以前農村嘅一種文化，家家戶戶都唔會閂屋企門，鄰居之間會互相到訪傾吓偈食吓嘢
鄺婆婆
兒時都係耕田，照顧兄弟姊妹，冇咩遊戲玩，所以依家有啲年青人上嚟同我玩六色積木好開心。
崔伯伯
以前都係玩啲汽水蓋、彈波子、踢毽同跳繩，仲有同同學玩捉伊因比賽。
而依定同啲年輕人玩six bricks比我感覺更加年輕，不過都係鍾意以前多啲因為以前人多，玩嘅氣氛好好多。
唔似依家多數望住部電話自己玩，我都係自己玩下數獨，練下腦筋。
游樹仁伯伯
細個個陣鍾意啲運動類型多，好似游水、跳繩、乒乓波同踢毽呢啲。
不過以前未冇電視，都係同鄰居傾偈多
同年輕人玩six bricks有返以前一大班人玩嘅氣氛，唔似依家個個都撳電話
細個都係玩公仔紙多，喺士多買完就直接玩，拍到佢地反轉就贏
依家啲玩具款式多好多，複雜好多。依家個六色積木好似以前咁簡單，但玩法就從未玩過，好新鮮！
P.S. 公仔紙即係魷魚遊戲入面的打畫片
大家能夠在活動之中一齊歡樂開心都好滿足，而青年人在過程之中陪伴長者的時光都十分珍貴，互相閒談，簡單的陪伴就足以體現到人情味了。